Hymnus ad Christum Regem

Details

Description

R/. Gloria, laus et honor tibi sit, rex Christe redemptor,
cui puerile decus prompsit Hosanna pium.

1. Israel es tu rex, Davidis et inclita proles,
nomine qui in Domini, rex benedicte, venis. R/.

2. Cœtus in excelsis te laudat cælicus omnis,
et mortalis homo, et cuncta creata simul. R/.

3. Plebs Hebræa tibi cum palmis obvia venit;
cum prece, voto, hymnis, adsumus ecce tibi. R/.

4. Hi tibi passuro solvebant munia laudis;
nos tibi regnanti pangimus ecce melos. R/.

5. Hi placuere tibi, placeat devotio nostra:
rex bone, rex clemens, cui bona cuncta placent. R/.